اصحي يامصر احمد فؤاد نجم

اصحى يا مصر
اصحى يا مصر
اصحى يا مصر
هزى هلالك
هاتى النصر
كونى يا مصر وعيشي يا مصر
مدي اديكى
وطولى العصر
اصحي وكوني وعيشي يا مصر
اصحى يا عامل مصر يا مجدع
وافهم دورك
ف الوردية
مهما بتتعب
مهما بتصنع
تعبك رايح
للحراميه
جهدك عملك
رزق عبالك
عرقك مرقك
ولا يهنا لك
اصحى يا عامل
غير حالك
صون المصنع
واصنع مصر
اصحى وكونى وعيشي يا مصر
اصحى يا زارع مصر الخضره
قدره وخضره
ونور وجمال
أبدر غيطك
واحمى البدره
ضد الافه
والاستغلال
أرضك عرضك
باب الدار
صبحوا مداسه
للسمسار
نعطش
ولانشربش عكار
وصفه قالوها الحكما يامصر
اصحى وكونى وعيشي يا مصر
واصحى يا جندى
يا تار الشهدا
عمى وخالك
اختى وأخوك
لجل ما تهدا وتارك يهدا
فرغ نارك ف اللى خانوك
يابن الشعب يا حامي الشعب
انت أملنا فى يوم الصعب
اصحى يا جندى ودق الكعب
حرر مصر وطهر مصر
اصحى وكوني وعيشي يا مصر