همسات وكلمات

الى السيد وزير الدفاع

نبهنا وكررنا وصرخنا وفقعنا بالصوت الحياني ان الصح صح والغلط فلازم يتم عمل محاكمات علنيه للمفسدين بشتى الصور في مصر واللي تثبت عليهم أي جريمه ولو سيادتك القضاء المصري مش قادر يحل طلاسم الموضوع دا زي ما في محاكمات عسكريه على بعض الناس من الشعب بالمره يتم عمل محاكمات عسكريه لناس نهبوا وخربوا بيت الشعب وجوعوا الشعب

السيد رئيس الوزراء

ليه سيادتك منتظر دايما اعتصام او مظاهره جديده علشان تبدء تفكر في عمل وتنفيذ المطلوب ؟

محافظ المنوفيه

امتى اشوف محافظ للمنوفيه بيمر على المدن والقرى والنجوع ولا هو كرسي المحافظين دا فيه منوم مغناطيسي ما ان يتم تعيين محافظ عليه حتى نلاقيه بياكل مش رز طبعا عشان الرز بيتهرب ع الحدود دلوقتى انما بياكل جاتوه او مهلبيه !

رئيس مجلس مدينة الباجور / منوفيه

مبروك عليك شباب الباجور العظيم سمعوا كلامى وقاموا وعملوا بنفسهم اكشاك لأكل العيش ما هو طالما مفيش وظايف في البلد الشباب اللي اهاليهم صرفوا دم قلبهم عليهم وباعوا كل ما يملكوا يعملوا ايه ويروحوا فين ؟

رئيس او مسؤل الري بالباجور منوفيه

هو انت لسه فاكر ان النائب كمال الشاذلي لسه موجود وخايف تدي قرار بهدم السور الحديدي اللى كان عملوا كمال الشاذلي على البحر مباشرة ولا في ايه بالظبط ما تفهمنا سيادتك لو تتكرم ولامتى الخوف والكوسه هيفضلوا حتى بعد الثوره ولا انت ما تعرفش ان فى ثوره قامت في مصر ولا هو فى ايه بالظبط ؟

شباب مركز الباجور منوفيه

والله العظيم رجاله وولاد رجاله وطالما الحقوق ضايعه ومنهوبه ولغاية دلوقتي مفيش محاسبه لا للى نهبوا ولا للي خربوا ولا للي سلبوا وقمتم انتم وبكل رجوله عملتم اكشاك تحت كوبري الباجور عشان تعيشوا منها وتحدوا من مشكلة البطاله والله العظيم رجاله وبكل ما تحويه الكلمه وربنا يحميكم يارب وياريت بقى يتم عمل ورق لاصحاب الاكشاك دي لحفظ ملكيتهم وحقوقهم وكمان عشان تكون دايما مصدر رزقهم وربنا يحميكم ياشباب يارب