مسلم مصري مسيحي

[center]

ياترى مين من مصلحتوا فتح باب جديد من زعزعة أمن وإستقرار مصر خصوصا في التوقيت اللي يعلم به ربنا دا !
حتى لو في خلافات يكون الحل بقتل روح بشريه ربنا سبحانه وتعالى حرم أصلا سفك دمها !
حتى لو في خلافات ننس الللي مصر فيه ونقوم إحنا نحلها بالقتل وتخويف إخواتنا المسيحيين !
حتى لو في خلافات إحنا مش ناسيين أبدا شجاعة وجرأة إخواننا المسيحيين وإحنا كنا بنصلي في ميدان التحرير وكانوا هما عاملين نفسهم دروع بشريه عشان حمايتنا !
حتى لو في خلافات نوسع مجالاتها بقتل ودم وتخويف وخراب !
حتى لو في خلافات ندهور أوضاع البلاد أكتر ما هي متدهوره ومفيش حد عارف البلاد رايحه لفين والمصير ايه ؟
حتى لو في خلافات يكون الحل كده !
القتل بأي صوره حرام
القتل في كل الديانات شرعا حرام
وبعدين عيب أوي ندي الفرصه للدخلاء وللجهلاء وراكبي الموجه إنهم يدخلوا وسطنا ويقوموا بأعمال هما أصلا بيدوروا عليها ومنتظرين فتح أي باب ووجود أي فرصه عشان يقوموا بأعمالهم الرخيصه والدنيئه وإشعال فتيل الفتنه بين شعب واحد ومش هقول ديانات
حرام
بجد حرام
والله العظيم حرام
أنا شايف إن الحال كده بيوصل شويه شويه لبث الرعب في قلوب الشعب بكل الطرق والوسايل ومين ولمصلحة مين مش قادر أفهم ؟
هل في أطراف داخليه يهمها الحال دا خصوصا من بعض أعوان الحرس القديم في النظام المخلوع عشان يثبتوا نظرية إن النظام كان صح !!!!!!!!
ولا عدو خارجي بيترقب الفرصه تلو الأخرى عشان يلاقى وسايل سهله للتخريب وللفساد وللتخويف !!!!!!!!!
كمواطن مصري ومسلم
لازم محاكمة المتسببين في قتل إخواننا المسيحيين ومش عايزين محاكمات تفضل سنين في أدراج المحاكم لأ أنا بطالب بمحاكمات عسكريه سريعه وبطالب بإعدام أي واحد يحاول إِشعال فتنه بين مسلم ومسيحي أو مسيحي ومسلم لأننا شعب واحد ووحده واحده
بكرر
وبكرر
وهكرر
لازم محاكمه عسكريه سريعه وفوريه وعادله للي بيقتلوا الناس ويروعوا الآمنين عشان يكونوا عبره ويعرفوا إن في حساب وعقاب وعشان يعرفوا إننا كمصريين مستحيل أصلا نقبل فرقه أو تفرق أو تخويف أو تفريق بين جموع الشعب الواحد ..
للمره المليون بخاطب المجلس الأعلى للقوات المسلحه
مطلوب سرعة القبض على القاتلين لإخواننا المسيحيين وسرعة محاكمتهم محاكمه عسكريه سريعه وشفافه وحياديه وعادله ..
ومش مصر اللي هتقبل كده تحت أي ظروف
إتقوا الله في مصر
إتقوا الله في مصر
إتقوا الله في مصر
وحسبي الله ونعم الوكيل في كل اللي وصلوا مصر للأحوال الفظيعه دي
وحسبي الله ونعم الوكيل في كل اللي وصلوا مصر للأحوال الفظيعه دي
وحسبي الله ونعم الوكيل في كل اللي وصلوا مصر للأحوال الفظيعه دي