أفكار للسيد رئيس مجلس مدينة الباجور

السيد الفاضل رئيس مجلس مدينة الباجور
انا مواطن من أبناء البلد دى ومن حقى أعبر عن وجهة نظرى ومن حقى كمان إنك تشوفها ومش عيب خالص لو كانت صح وتفيد الناس إنك تنفذها لأن سيادتك من المفترض إنك جهة تنفيذ لصالح المواطنين ..
من هنا عندى شوية مقترحات لسيادتك وياريت تنظر ليها لو سمحت وهى :
.. العيش اللي بيتوزع الفجر على محلات أغلبها مغلق ومقفول بيكون وسيلة جذب للقطط والكلاب على الأقل بتدوس عليه ووارد جدا كمان حشرات ومش تنسى سيادتك في شئ إسموا الوقايه أهم من العلاج فياريت عشان نحل المشكله دي إما إن المخابز دي تشتغل مثلا الساعه 3 الفجر وعلى ما تخلص يكون المحلات فتحت وكمان يكون الخبز طازج وغير ملوث وآمن لأننا من حقنا نأكل خبز صحي وآمن ودا مش إختراع أو مطلب مستحيل .
..تحت كوبري الباجور ممكن مجلس المدينه يقوم بعمل محلات مصغره أو على الأقل أكشاك ويقوم بتوزيعها بالعدل على الناس اللى تستحقها من هنا نكون قضينا على مشكلات واسعه وشاسعه وبتحصل كل يوم منها البطاله اللي بتوصل للسرقه وللإغتصاب ومشاكل كتيره كلنا في غني عنها وكمان هتدخل دخل للدوله يدعم مجلس المدينه في عمل مشروعات جديده تفيد الناس وطبعا يكون إيجارها بمبلغ مناسب يتناسب مع الظروف الإقتصاديه للبلد هنا .
.. ياريت سيادتك تتابع مياه الشرب اللي بنشربها كويس لأن فى اليوم اللى بيقطعوا فيه المياه عن الناس لإجراه الصيانه ولما بترجع مياه الشرب بيكون لونها غامق وغريب جدا وعايز أعرف ياترى إيه الأسباب وياترى دور سيادتك إيه فى المشكله دى لو سمحت ؟
.. بعض طرق الباجور تحتاج لرصف وتشجير ياترى دور مجلس المدينه إيه ؟
عايزين تحديد لموقف للسيارات ويكون آمن ومناسب ويخدم الناس لأن الناس دلوقتي اللى بتسافر مصر بتسافر بخناقات وأمور غريبه ومفيش أي رقيب ليه مش عارف وفين المسئولين بردوا مش عارف ؟
..فى مشروع بندفع لو فلوس وهو مشروع أكياس القمامه ليه مش بتتوزع زي الأول في حين إن مجلس المدينه بياخد من الناس فلوس عليها ياسيادة رئيس مجلس المدينه ؟
.. سوق الباجور تحت السكه الحديد خطر داهم على المواطنين ومش عارف إيه سبب نقل السوق دا أصلا من مكانوا القديم وياترى إيه المانع رجوعوا مره تانيه مكانوا ؟
في ناس بتقوم بإجراء عمليات بناء على أراضي زراعيه وكتير جدا في حين إن دا ممنوع طيب ياترى دور سيادتك ودور المجلس الموقر إيه عشان أكون فاهم ؟
ياسيادة رئيس مجلس مدينة الباجور المحترم هو سيادتك ياترى لسه عايش على أطلال النظام القديم ولا فى إيه بالظبط ياريت سياسة النوم فى المكاتب تنتهى وياريت بجد يكون فى شوية إهتمام بالمواطن حضرتك وكل مسئول فى مصر مش جايين عشان تعملوا مهمين علينا وتناموا في المكاتب وبس لا سيادتك في ثوره قامت وشعب فاق من غيبوبات السكوت والخضوع والسكوت ومش عايزين نفتح أبواب مغلقه تاني إحنا دلوقتي عايزين نصلح مش ننرجع ننام تاني ولعلم سيادتك أنا هتابع وهشوف وأنا مواطن من الباجور ومواطن مصرى زى ماليا واجبات على البلد بردوا ليا حقوق ومش هسيبها وبكرر لسيادتك مش هسيبها ومش هبطل أكتب ولو مش حسيت بتغيير مفيد هصور موضوعاتى وهقوم بنفسى بإرسالها للجهات المختصه خلاص زمن كلوا تمام والنوم فى العسل عايزين ننهيه ولازم ننهيه مصالح الناس فوق أي إعتبار تاني وكفايه بقى اللي حصل لمصر مش عايزين نرجع لعصور النوم والفساد تاني لو سمحت ..
وهتابع وهشوف سيادتك هتتصرف إزاى ..