هل مازال حسني مبارك يحكم مصر ؟

من طرف ياسر عبد الباقي الخميس مارس 17, 2011 4:36 am

لما يطلعوا علينا ويقولوا نفس التعديلات اللي كان إقترحها الرئيس المخلوع السابق

( دا لو فعلا إتخلع ! ) ودلوقتي عايزينا نوافق أو نرفض التعديلات اللي كان فخامتوا عايز يعملها يبقى دا إيه ؟

لما يكون في لسه معتقلين داخل السجون المصريه ومنها سجن إسموا سجن العقرب وهما أصلا مفيش عليهم أي قضايا والغريب والمثير لكل الشكوك إنهم واخدين حكم إفراج يبقى دا إيه ؟

لما تتشال يافطة أمن الدوله والأماكن موجوده والجهاز شغال ومن أماكن تانيه دا غير الأوراق اللى إتحرقت واللي إتقطعت ..

يبقى مين ورا حرقها ومين ورا قطعها ولصالح مين دا يبقى إيه ؟

لما يطلب شعب حكومه جديده ووجوه جديده ويحصل ولكن مازال موجود وجود من الحرس القديم اللي إتفضح من نهب البلد وسلب خيراتها دا يبقى إيه ؟

هو مين بيضحك على مين ؟

هو في إيه ؟

هو إحنا هنرجع لتخدير الشعب وتسكينوا تاني ؟

هو مش المفروض إن العالم كلوا أجمع على شرعية الثوره وعدالة مطالبها طيب اللي بيحصل عكسها دا لصالح مين ويبقى إيه ؟

لما يكون رئيس جمهوريه أسقط وتم خلعه وظهرت كميات فساد وبلاوي سوده ومنيله بستين ألف نيله ونهب وسلب وإغتصابات ومعتقلات وووووووو وكميات لا حصر لها من قضايا الفساد منها اللي إتفتح ومنها اللي في الطريق لفتحوا ومنها اللي لسه مخفي لغاية دلوقتي دا يبقى إيه ؟

لما بيتخلع رئيس دوله نظرا لفساد أو غيروا من الأمور اللي تمس أمن الوطن والمواطن ومش يتحاكم دا يبقى إيه ؟

لما تكون دوله فى حجم مصر وكلنا كنا عارفين وواثقين وشايفين ومحدش يقول لى ورق ملعون الورق لو الموضوع موضوع ورق وهات ورق نبقى هنرجع تانى لحكاية البيضه الأول ولا الكتكوت !

جمال مبارك فين من المحاكمات ؟؟؟؟؟؟؟؟؟؟؟؟؟؟؟

علاء مبارك فين من المحاكمات ؟؟؟؟؟؟؟؟؟؟؟؟؟؟؟

سوزان مبارك فين من المحاكمات ؟؟؟؟؟؟؟؟؟؟؟؟؟؟

هي المحاكمات دي بتمشى على ناس وتسيب ناس ولا فى إيه بالظبط عايز أفهم ؟

لما نلاقي أحجام وأنواع وأشكال الفساد والبلاوي دي كلها من وزراء سابقين طيب يكون حال رئيس الدوله نفسوا إيه ؟

ياجماعه في حاجات غريبه بتحصل وإحنا مش عارفين في إيه بالظبط ؟

وبكرر محدش يقول لي ورق لأن في أمور مش محتاجه ورق ومكشوفه بس زى ما قلت في تواطئ وفي شكوك كبيره إن حسني مبارك مازال حاكم مصر برغم الثوره وبرغم التنحي وإلا ليه لغاية دلوقتي مش إتحاكم ع الأقل بصفته وبشخصه على أحداث الثوره خصوصا شهداء الثوره المفروض أول واحد يتحاكم عليهم مييييييييين ؟؟؟؟؟؟؟؟؟

فهموني أنا شايف إن في أمور غلط وشامم ريحة طبيخ وشامم ريحة حاجات غامضه وغريبه من مصلحتها تهدم وتحطم إنجازات الثوره !!!!!!!!!!!!!!

عايز حد يجاوبنى على فساد كبير وأرقام كبيره شفناها وسمعناها وكلها على النت لفساد الأسره المالكه اللي هلكت الشعب وفسدت الشعب وأحدثت حالات مرض وخوف وضعف وفقر للشعب وبرغم كده حسني مبارك لسه بيتنزه في مارينا وكأن لا ثوره قامت ولا تغيير حصل دا لمصلحة مين ويفيد مين وضد مين ؟

الثوره بتتهد وبهدوء

بكرر

الثوره بتتهد وبهدوء

بكرر تانى وتالت

الثوره بتتهد وبهدوء

عايز حد يقنعني هل كلامى غلط ولا صح وأنا كتبت بلغه عاميه لأني مواطن عادي من ضمن مواطني الشعب اللي إتفرم ظلم وغش وخداع وغدر وإستخفافات بكل حقوقوا سنوات وسنوات وسنوات ويمكن دلوقتي نفس النظام شغال !

بطالب بمحاكمة حسنى مبارك على جرائم في حق الإنسانيه أصل محدش يفهمني إن حبيب العادلي لوحدوا متورط في ضرب النار وإصابات كتيره وإستشهاد مئات من خيرة شبابنا ومستحيل العادلي يقرر دا دون الرجوع لمبارك وأنا هنا مش مع العادلي وبدافع أو بهاجم الرئيس المخلوع إنما بس مستغرب وبسأل فين حسني مبارك من دم الشهداء اللي مازال لغاية دلوقتي بينزف فينا كلنا ومالوش أي تمن ؟؟؟؟؟؟؟!!!!!!!!

الثوره بتتهد

وواضحه وضوح الشمس ومحدش يفهمني إن حساب وأموال الأسره الملكه ونسايبهم ومحاسيبهم وأعوانهم هي دي قضيتهم وبس لا الموضوعات متعقده ومتلخبطه وطويله وكتيره ومعقده ولغاية دلوقتي الموضوع هادي وعادي وكأن مفيش أي شئ حصل !!!

كمواطن مصري وبخاطب كل الساده المحترمين اللي ماسكين زمام وأمور البلاد دلوقتي الكلام عن العداله جميل ومتحمس وحلو إنما ياحضرات الكرام ما زالت العداله غايبه ونايمه وواخده أجازه ومازالت الحصانه شغاله حتى بعد الخلع !

بطالب بمحاكمات ل :

1- حسني مبارك بصفته وشخصه خصوصا عن دم الشهداء .

2- سوزان مبارك بصفتها وشخصا كمشتركه في بلاوى كتيره في البلد .

3- الطاووس جمال مبارك لازم يتحاكم وكلنا عارفين ليه وعشان إيه .

4- علاء مبارك بصفته وبشخصه .

دا غير أصدقاء مبارك نفسوا وحاشيتوا وأنساب ولادوا وربما جيرانوا وغالبا حبايبوا وإصحابوا لأن أمور الفساد متعمقه وطويله وكتيره ..

أطالب كمواطن مصري بعمل لجنه لفحص ملفات الفساد زي ما في وزارات إتحلت محتاجين في التوقيت دا لجنه أو وزاره لفحص ومحاسبة الفساد وملفات الفساد اللي أطول من شريط السكه الحديد وأعمق من نهر النيل وأسود من قرون الخروب ....

لصالح الناس

ولصالح الوطن

إن كنا نريد فعلا حريه وعدل وعداله لابد أن نراها واضحه وحاده وسريعه ليست كسلحفاه ولا كصاروخ ولكن في حدود العقل والمنطق والمواقف والظروف ..

أخشى ما أخشاه أن تكون موجوده أيادي تدمر الثوره في بطء وفي هدوء وفي مكر ودهاء وفي غفله من الزمن !!!!

والأيام بينا ..