بدء جلسا محاكمة الرئيس المخلوع وزوجته وأولاده الآن

من طرف ياسر عبد الباقي الأحد أبريل 03, 2011 2:09 am

الآن فقط

عرف النائب العام أن هناك رئيس ظلم وفسد وغش وتسبب في قتل وتخريب البلاد

الآن فقط

سيبدأ النائب العام فتح ملف الرئيس المخلوع

الآن فقط

ستبدأ محاكمة سوزان هانم على بلاويها

الآن فقط

سيبدأ محاكمة ولاد حسنى مبارك على البلاوي اللي عملوه في مصر

دلوقتي وبس وبعد مرور أكتر من شهرين على الثوره بدأ سيادة النائب العام يفكر إن في رئيس ورا كل دا وبدأ دلوقتي اللحظات دي يستدعيه عشان يسألوا وبصراحه أنا مش عارف ولا فاهم أصلا :

دا الوقت ؟

وليه مش تم دا من وقت خلعوا ؟

وليه لغاية دلوقتي هل عشان يهرب باقي فلوسوا ؟

ليه لغاية دلوقتي يسيبوا رئيس نظام مخلوع خرب ودمر وفسد ونهب وتسبب في وجود حكومات فاشله وفاسده وناهبه أصلا !

لغاية دلوقتي ودلوقتي بس بدأ سيادة فخامة النائب العام يفكر إن في رئيس موجود ( مخلوع ) وكان لازم يتحاسب أول واحد على نهب أراضي البلد وأموال البلد وشهداء الثوره !؟

في إيه يا إخواننا

حد يرد عليا

حد يفهمني

حد يعرفني العدل دا ماشي ازاي وصدعونا بالعداله والمستشارين والحياديه والنزاهه والكوسه ريحتها واضحه ع الآخر !

حد يفهمنى ليه يسيبوا الرئيس المخلوع حر وطليق لغاية دلوقتي وجايين يفكروا بعد شهرين من الثوره يحاسبوه !

الله أكبر على العداله

الله أكبر على الشفافيه

الله أكبر على القانون اللي صدعونا بيه

الله أكبر على الكوسه والفاصوليا والمسقعه

الله أكبر على ترك رئيس مخلوع هو وزوجتوا وولادوا في حين في دماء طاهره لغاية دلوقتي مفيش أي تمن ليها ؟!

الله أكبر على عجلات العدل اللي بتمشي ومصممه بطريقة السلحفاويه ومش عارف إمتى تكون سريعه وحاده وجاده على طول زي ما بيحصل مع أي غلبان !

الله أكبر وربنا يستر والقادم شكلوا كده زفت على بلك على هباب على بلاوي سوده ومنيله بستين ألف نيله ما هي أصلها خربانه خربانه بقى وكل واحد بمزاجوا

عادى بقى

ربنا يستر

أنا تعبت وربنا كتابه