أثناء عودتي من أمن الدوله بسبب كمال الشاذلي

[center]يا جلادين الشعب سنواتوا العجاف
يا جلادين بطرس مع أحمد
مع نبيله أو عفاف
يا معلمينا إزاى نوطى ونستخبى
أو نخاف
يا جلادين الشعب أصلوا فرعونى وجاحد
ونسي الموالد والعطايا والموائد
دا شعب ناكر إجلدوه
وعن الحقايق توهوه
ومن العداله إحرقوه
دا شعب فرعون من سنين
وإنتم غلابه يا جلادين
ضحكوا علينا بدم فاسد
وقمح فاسد
واغرب كلام كان م الحكومه
دا شعب فاسد
والله بضحك وانا حزين
ياجلادين يا طيبين
عايز كمان مليون عصايه ع الإيدين
والفلكه ديا الطيبه تشوي الرجلين
وتغور كرامتى
بس الأهم
اوعوا تتصاب ايدى بالأذى يا حنينيين
سلم لى على عدل وعداله
وارفع شعار الإستحاله
وقول كمان لإبن الأشــــــــــــراف
افسد ياكيمو فى الباجور
انت القوي وإحنا الضعاف
ارفع شعار السجن للي يعارض
واوهب لبلطجتك نعيمك وباسراف
سلامات ياحقوق الإنسان
سلامات والشعب بقى جبان
سلامات وقيمنا أوراق
وحرياتنا = هوان
قلنا نرفض للتزوير
كانت جزائنا التشهير
كان جزائي أمن دوله
وأنا لا قوه ولا حوله
والذنب إيه ؟
كمال بيه
كان لازم أقبل التزوير وأقول صح النفاق
كان لازم أوطي لبلطجى ويغور زمان الكبرياء
كان لازم أبوس إيد كمال
وحاشية كمال
وبلطجية كمال
وبكده نعيم الحياه هيجينى وقت أنا ما أشاء
كان لازم اهلل لكمال
وأطبل لكمال
كان فاضل أقضي فرائض الصلاه والحج والصوم والزكاه
علشان كمال
وآهين ياحال
الحق ليه فيه إستحال
والخيبه جايه طول وعرض
يمين شمال
حتى الضلال هنا فى الباجور
بقى مسرحيه ف ايد عيال
أما شريف أهل الباجور
انسان مريض
وعدو بغيض
علشان بيرفض دستور البيه كمال
وتزييف البيه كمال
وتزوير إنتخابات البيه كمال
وتقبيل أحذيه البيه كمال
بهي الطلعه
نقي السمعه
المتمكن في كل حال من الأحوال
البيه كمال
يابيه كمال بسأل سؤال
أنا رحت أمن الدوله ليه ؟
وخرجت تاني منوا ليه ؟
ما تجاوبني ياعم قول لي
سكت ليه ؟
عايز أعرف إيه ذنبي أو إيه تهمتي
رسينى ايه قضيتي
علشان صرخت وقلت لا لا لفسادك
ولا عشان قلت أنا مش من ولادك
حاشية الكذب الكبيره
ولا عشان رفضت أبوس كرباج جلادك
قول يا كمال
عرفني إعتقلوني ليه ؟
عرفني ليه خرجوني تاني ليه ؟
إخص عليكي يابلد مفقوده فيها كلمتي
إخص عليكي يابلد
تهموني .. وإيه قضيتي
إخص عليكي يابلد
إغتالوا إنسانيتي
إخص عليكي يابلد
مكتومه ليه صرختي
إخص عليكى يا بلد
لما تدي الحق كل الحق
للي يبيحوا حريتي
إخص عليكي يابلد
لما زمام الأمر يبقى ف ايد عيال
والحق يصبح مسرحيات من خيال
والكدب يبقى غول كبير
وعلينا تقيبل الأيادي ف كل حال
آه يابلد
بقى دا جزاء اللي يقول الحق في وقت السخافه
ولا حقوق الناس بقت أوهام وأكاذيب أو خرافه
ما تعرفوني ليه رحت أمن الدوله أنا
ما تفهموني ليه خرجت تاني أنا
لا كلام
خلص الكلام

[/center]