الجيش .. للرجال فقط

جميل جدا الثوره وجميل جدا المطالب الخاصه بشعب صنع ثوره وجميل أكتر وأكتر إن العالم كلوا إحترم شرعية الثوره حتى المجلس الأعلى للقوات المسلحه بنفسوا أعلن دا

لكن لما نقول : حريه ..

المفروض نكون فاهمين وعارفين يعنى إيه حريه لأن في أمور لو حصلت زي ما البعض عايز مش بتكون أبدا دي حريه لكنها بتكون فوضى وهمجيه وتطاول وقمع حقوق الغير وتخبط في أمور الحياه ولو لا قدر الله حصلت الأمور دي بيوصل صاحبها أو إصحابها أو شعبها حسب الفاعل لكارثه فظيعه ومروعه ولا يعلم عواقبها غير المولى عز وجل ..

الجميل وقت حدوث الثوره وجود ( بنات ) وربما صاحبة الثوره الأصليه أسماء كلنا عارفينها وعارفين حماسها كويس وبنحترمها جدا وعن نفسي بكن ليها عميق الإحترام وعن قناعه ولكن :

خرجت بعض أصوات البنات تطالب السيد وزير الدفاع بإنهم عايزين يلتحقوا بالقوات المسلحه !

طبعا اللحاق بالمنظومه دي أصلا شرف لأي مواطن مصري ولكن مع إننا عايزين وبنطالب وبنناشد بالحريه لكن الحريه المقننه الحريه التى لا تحدث فتن ولا هدم ولا تخريب ..

الحريه الشرعيه المعتدله المفيده ( والمطلوبه )

مش معقول تحت شعار الحريه ومش هقول المساواه لأن ربنا سبحانه وتعالى جعل للرجل صفات وللبنت صفات ولو فرضنا جدلا إن الجنديه حق للبنت ممكن على النقيض نقول الحمل حق للرجل ويبقى الموضوع خارج عن المعقول أصلا !

لا طبعا دا شئ مرفوض ومش مقبول خصوصا في مجتمعنا المعتدل آه عايزين دوله وسطيه علمانيه ولكن شرقيه بسمات محترمه وقواعد وأسس لا تخدش الحياء ولا تحدث تصادمات ولا تودي إلى فظائع وأهوال وكوارث ..

إذا كانت البنت بتصرخ من التحرش سواء في المواصلات أو الأماكن العامه أو دور السينما أو حتى الجامعات ما بالكم ياللى بتخاطبوا السيد المشير بضرورة إلتحاقكم بالجنديه المصريه !

لا طبعا دا موضوع غير مقبول والوقت مش محتاج الخروج لموضوعات متشعبات وياريت مش ألاقى بكره أو بعدوا أو كمان أيام مظاهره من الجنس الناعم تقول إن ليها مطالب وعايزين يلتحقوا بالجيش المصري !

أنا ضد دا مع خالص إحترامي وإيماني بدور البنت جنبا إلى جنب مع الولد في مجتمعنا ولكن مع أهمية الحفاظ على عاداتنا وتقاليدنا وقيمنا المعتدله ( المحترمه دائما ) حتى لو في بعض التجاوزات ..

إحنا مش في تل أبيب عشان نكون أو نعمل زيهم وجيشنا بخير ورجال مصر بخير ويا إخواتي البنات الحريه آه حق مكفول ليكم تماما زي الولد بالظبط ولكن لكل شئ معيار ولكل عمل نظام وطبيعة تركيبة جسم الراجل مختلفه تماما عن جسم الإنثى ..

عايزينكم في المصانع مفيش مانع في المكاتب أهلا وسهلا في الجامعات دا حق طبيعي ليكم في كل أمور الحياه أهلا بيكم ولكن في أعمال من الصعب إن لم يكن من المستحيل تواجدكم فيها ودا مش تقليل منكم أو تشكيك في قدراتكم إنما للحفاظ عليكم لأنكم ثروة عطاء في مستقبل البلاد ..

إطلاقا أنا مش بحجر على حريتكم ولكن أنا ضد الحريه الفوضاويه الغوغائيه الغير مقبوله ومش تنسوا إن إحنا مجتمع مختلف تماما عن غيرنا من بلاد الغرب وكمان عمرنا ما هنكون مقلدين لليهود تحت أي ظروف ..

كان من باب الصواب التفكير في الأمر قبل ما يكون مطلب وعلى كل حال إنتم فعلا ليكم أدوار مشرفه وأغلب الرجال المشاهير ورائهم نساء وسيدات فاضلات وعلى قدر كبير من الفكر والعقليات المحترمه والمفيده ..

آه عايزين حريه بس من غير ما ندخل في متاهات تانيه البلد مش متحملاها

آه عايزين مساواه بس لكل عمل فكروا ونظاموا وأسلوبوا

آه عايزين تحضر وشفافيه لكن مش على حساب عاداتنا وتقاليدنا

آه عايزين عداله بس مش ظلم أبدا إننا نوجهكم إن مجرد التفكير في الإلتحاق بالمنظومه العسكريه المصريه أمر شاق وصعب جسديا ودينيا أمر ستعوقه عوائق شديده

ياريت نحاول نستخدم الحريه صح

وياريت قبل ما نطلب نفكر في عواقب الطلب

وياريت نخلي المسئولين يركزوا في مستقبل البلاد أفضل وبصوره أكثر هدوء

مش كده ولا ايه ؟