عايزين أسماء البلطجيه جمعوا نواب مجلسي الشعب والشورى السابقين هما يعرفوكم

من طرف ياسر عبد الباقي الأحد أبريل 03, 2011 2:18 am

أنا مش عارف هو لسه في توابع لمملكة قمعستان اللي عاصمتها قهرستان لغاية دلوقتي ولا في إيه بالظبط ؟

إيه اللى حصل في الإستاد دا ؟

ومين وراه ؟

وإيه الدوافع لكده ؟

ومين مصلحتوا دا وفي التوقيت دا ؟

وفي إيه جاي تاني ؟

حتى الرياضه كمان هتدخل فيها السياسه والبلطجه والتخريب

عارفين ليه ؟

أقولكم أنا ليه وبوضوح الشمس

عشان فاشلي ومرتزقة وبلطجية الحزن الواطي الإنحطاطي يقولوا للناس شايفين كان النظام مأمن البلد !

في وجود معتقلات ..

شايفين بعد النظام بيحصل إيه ؟

نهب وسرقه وبلطجه وخراب وقت وقبل وبعد النظام وهي هي ومفيش جديد ؟

اللي من مصلحتهم كده فعلا مش ممكن أبدا يكون ناس من أهل الرياضه ومستحيل يكون رياضي بيتحلى بالروح الرياضيه حتى لو متعصب شويه إنوا ينزل بالشكل الهمجي القبيح دا ويعمل كده

أنا قلت

وصرخت

وفقعت بالصوت

ولطمت على وشي

وعمال أأذن في مالطه ليا أكثر من شهر ونص

إرجعوا لنواب البلاد هما معاهم أسماء البلطجيه ودي حقيقه مؤكده وأتحدى اللي يقول لي خلاف كده وقتها هيتحدد أسماء البلطجيه وتبدأ البلد حركة تطهير فوريه بمحاكمات عسكريه قويه وسريعه وعلنيه لأن بصراحه المحاكم المدنيه بتاعتنا لسه لغاية دلوقتي ماشيه بطريقة ( السلحفاويه ! ) الممله والبطيئه !

المحاكم العسكريه سريعه ومحدده وحاذمه وناس جادين على طول ودوغري مش بيحبوا اللف والدوران والتمحيك وتضييع الوقت !

لو ترجعوا لأعضاء مجلسي الشعب والشورى السابقين خصوصا في آخر دوره هما عارفين كويس أٍماء البلطجيه ومسجلين الخطر وبكده نكون وصلنا لأسماء الناس اللي عاملين بلبله وخلخله أمنيه في كل المحافظات تقريبا ..

أنا قلت وحذرت وكررت ونبهت بأن القادم أسوأ ومحدش سامعني وشكلي بكلم روحي أصلا أو زي ما بيقولوا بأذن في مالطه........

والله العظيم حرام

حسبي الله ونعم الوكيل في كل مفسد وظالم ومتكاسل ومتخاذل